Dr Rudy Tawie teulihka PhD ari universiti KAIST

Seiku nembiak Iban, Dr Rudy Tawie udah nempa nama entara mayuh bansa Iban sereta ke menua Sarawak laban udah mujur tulihka ‘Doctorate of Philosophy’ (PhD) ba ‘Kejuruteraan Awam’ ari sebuah universiti ke tebilang ba Asia taja pan nujah mayuh penanggul.
Iya mega nyadi seiku Iban keterubah mujur teulihka PhD ari Korea Advanced Institute of Science and Technology (KAIST), ke dipadu entara 100 universiti ke pengabis manah ba renggat dunya.
Rayat Malaysia keterubah tulihka PhD ari universiti ke sama, iya nya Poh Kit Chong ba taun 1971.
Rudi nerima ‘scroll’ iya hari Lima tu tadi ba Universiti di Daejeon, Korea Selatan, ke besaksika apai indai iya, Joseph enggau Roselind, bini iya Frederica Boyer enggau indai tuai iya Agnes Tiong Hie Ming.
Rudy entara 507 iku bansa Korea sereta ari menua luar ke nerima ‘scroll’ ari universiti nya.
Rudy ngabiska kus PhD iya enggau mujur ba bulan Ogos tu tadi sereta teulihka 89.44 mata ari 100.
Universiti tu mega sigi ditemu entara universiti ke tusah dipasuk kelimpah ari kus ke disediaka pan enda muntang dipelajar.
Dalam kandang pelajar iya ba universiti nya, iya dipinta ngeluarka pengawa pansik iya ba siti journal antarabansa ke digaga iya empu, lalu tulihka pemutus ke pengabis mujur.
Apai iya, Joseph madahka iya berasai temegah hati meda pemujur Rudy.
“Kami ke apai indai ngagai bala anak aku, lalu ditambah enggau kami ke ulih ngenataika diri ngagai konvokesyen Rudy ba universiti tu, nadai ulih tatka ati aku meda anak lelaki aku lumur tiga bejalai ba atas panggau nerima ‘scroll’ iya entara bansa Korea enggau bansa bukai.
“Kami duai melaki bini, berasai temegah ati meda Rudy, taja pan mayuh bendar penanggul ke ditapi iya ngulihka pelajar tinggi sereta mujur ba pelajar iya ba bidang injinir.
“Aku mega berasai gaga hati laban ukai semina Rudy aja ke mujur ba pelajar sereta pengawa iya, tang tiga iku anak lelaki aku ke bukai. Edwin, mujur graduate bulih ‘Bachelor of Mass Communication’, Victor ‘Bachelor Degree in Accountancy’ sereta anak lelaki aku ke biak, Mervin tulihka ‘Bachelor Degree in Electrical Engineering’. Diatu semua sida iya mujur gawa enggau pengawa ke manah,” ku iya.
Rudy, 35, siku pensyarah ba UiTM kampus Kota Samarahan, keterubah iya ngerejister diri nyadi nembiak PhD empat taun tu ke udah nengah biasiswa Opis Menteri Pelajar Tinggi.
Ba entara taun 2000-2001, iya ngambi ‘masters’ ba Universiti Heriot-Watt, Scotland.
Iya mega bulih Diploma iya ba kus ‘Civil Engineering and Bachelor of Civil Engineering’ ari UiTM ke ngena geran diungkupka ulih Dayak Trust Fund.
Sebedau nya, iya kala minta biasiswa ari Yayasan Sarawak tang enda mujur ngulihka biasiswa nya.
Laban pemandai iya (ninting semester iya bulih ‘senarai dekan’ (dean’s list), iya diiru UiTM ari baruh skim ‘Young Tutors Scheme.
Kediatu, bisi lima iku nembiak Malaysia ke bulih PhD sereta sekeda ke ngambi ‘Masters’ ba KAIST.
KAIST ba penuduk iya ke ba Daedeok Science Town, Daejeon, Korea Selatan dibuka ulih perintah Korea Selatan ba taun 1971 ke dipadu nyadi pansik keterubah menua Korea Selatan palan alai pansik pelajar Sains enggau Injinir.
KAIST nyadi siti entara palan sains enggau teknologi ke pengabis manah ba Korea. Iya mega ngungkup palan alai pelajar pemansang sains enggau teknologi moden menua Korea, ke mega palan ke mayuh ngelatih saintis sereta raban injinir, orang ke bepengelandik ba bidang nya, sereta tuai pemesai menua enggau menua luar tebilang ke kala belajar ba universiti nya.
Tukang pansik ‘QS World University Ranking’ ba taun 2010 madu KAIST ba lumur 79 ba renggat dunya sereta ke 24 pemujur sabjek injinir enggau IT ba dunya.
Iya mega dipadu universiti pengabis manah ba Republik Korea, sereta universiti ke tujuh pengabis manah ba entara 100 lis universiti Asia, ku ‘The QS World University Rankings’ madah ba surat keterubah dikeluarka sida iya.
Lebuh KAIST dibuka ba taun 1971, iya ngambi entara nembiak ke pengabis pandai ba dunya belajar ba universiti nya.
Presiden KAIST kediatu, Nam Pyo Suh seiku ari bekau professor ba MIT, USA. Datai kediatu universiti nya udah ngeluar 8,458 graduan PhD ba sains enggau injinir.


Sumber: Borneo Post Online 15 February 2011

Beserakup Kitai Tegap, Bepecah Kitai Pambar

PEACE NO WAR

Endang sigi di ajih, di pinta kitai semua menua kitai likun ari semua penangur. Aku pecaya nadai kitai ngajih ka menua kitai Malaysia ke lebih agi menua Sarawak tuk kena tuntung penusah ketegal perang.

Walaupun mayuh macam isu ba media massa ti tau ngasuh penyarut nuntung menua kitai tuk, tang meh menua kitai bisi atur, bisi adat ti cukup ea likun. Menua kitai bisi “Agensi Pengaman” baka sida Polis, Askar, lawyer serta mayuh agi. Sida tuk meh ke nyaga pengelikun menua kitai.

Munyi ko jaku ti di sebut Timbalan Menteri Luar Datuk Richard Riot ba pengerami sambutan Gawai Muhibah Perbatasan ba Kampung Entubuh, Tebedu malam kemari madah “Rakyat Malaysia dan Indonesia terutamanya kita di perbatasan ini adalah satu rumpun dan kita adalah satu bangsa yang digelar bangsa ASEAN dan hanya yang memisahkan kita adalah sempadan negara. “Justeru, persahabatan yang sekian lama terjalin ini hendaklah dikekalkan dan janganlah kita terpengaruh dengan apa sahaja kempen nasionalisme seperti yang dicetuskan oleh sekumpulan rakyat Indonesia di Jakarta baru-baru ini,”

Baka berita ti ngasuh ati kitai bala pembaca Blog tertanya-tanya laban siti kes ti tau ngasuh penyarut ba menua kitai tuk ti tau ngasuh kitai bemunsuh sesama bansa. Cerita nama nya neh? Na… cerita ke bekaul enggau raban Silat Helang Putih ari Kuching ti udah nyamah nembiak kitai bansa iban. Kitai enda tau ngambi serious hal baka tuk, kebuah pia laban menua kitai bisi atur serta undang-undang ti likun.

Taja pun cerita baka nya ti bejai bansa kitai iban, tang kitai enda tau ngeruntu madah yang bansa lain nya salah laban ari semua orang ti bebangsa nya semina seorang dua aja ti ngembuan ati jai agai bansa kitai. Kitai enda tau madah ke bangsa nya salah ketegal seorang aja ti ngereja nyamah serta maluk nembiak kitai iban nya.

Anang baka kes ba menua sepiak (Jakarta-Indonesia) kategal soerang ngreja pangawa semua rakyat ti enda nemu ulu ili cerita kena rampit. Menua kitai bisi “agensi Pengaman”, enti bisi kes ke bersangkut paut enggau agama, bangsa serta kes-kes ti tau ngasuh rakyat kitai bemunsuh, awak ke sida ea ti lebih nemu agi mutar ke penangur nya. Anang kitai ke enda nemu ulu ili cerita ngemesai ke cerita nya.

Perdana Menteri kitai empu suah amat madah SATU (1) MALAYSIA. Nama tuju nya deh? Tuju ea meh ke dikena nyaga kaul serta serakup semua bangsa serta agama ba menua kitai tuk. Tang meh, laban ti gila kuasa serta amu ka ngempu reta mayuh, bisi sekeda rakyat kitai nya sengaja ngemesai ke isu ti tau ngasuh belaya bepantap bemunsuh serta bebunuh antara siti bansa serta antara siti-siti agama. Orang ti bepikir berunding baka tuk enda tau disukung serta enda tau nyadi ke tuai ba menua kitai. Diatu ea ka ngenyarut ke bansa kitai dalam Malaysia, ila-ila kada enda ea tuk ngasuh menua kitai Malaysia carut beperang enggau menua Negara bukai ga deh. Nya perlu di runding kitai diatu.